صالون / رائي وتجربتي مع صالون TONI & GUY

Monday, March 04, 2013



 ’,

يسعد لي صبآحكم وممسآكم  !!
اليوم كان يوم جمممممممميل جدا وانثوي جدا جدا !!
ايش الهرجه ؟؟؟؟
عندي مناسبه بعد اسبوعين تقريبآ وفجئه مسكت براسي اصبغ الا والا اصبغ !!!
للمعلوميه شعري مصبوغ اخر مره قبل تقريبآ 8 شهور ل9 حاجه من كدآ
ومو اي صبغه مصبوغ بني غامق يعننننني لون اسود فاحم !!
عموما ماحبيت اخاطر بشعررري واعدمه بصالون عادي او حتى مشهور بس همه الماده ,.
ويحاولون يصبغونه عشان الفلوس ولو مازبط تقلي مالي شغل شعرك مصبوغ اسود !!!!
فبحثت عن صالون بروفشينال في الشعر !!
طلع لي صالون توني اند قآي البريطاني الاصل ,.
له اكتر من 50 سنه في مجال الصبغآت والهير ستايل ككل ,.
له اكتر من 420 فرع حول العاااااالم !!
موجود بالبحرين / الكويت / دبي
وبالسعوديه مافي الا فرع جده !!
فتح له سنه ونص تقريبا عندنآ وفيه فرع للرجال كمان ,.
عمومآ اتصلت واخذت موعد ع الساعه 5 ,. ورحت

هذي لوحتو ,. مدري ليش مسمينه العنايه البيضاء !!




المحل موجود بالتحليه خلف القثمي ,. بمركز اسمه مركز التحليه
مو التحليه سنتر لااااا ,. في مركز اسمه التحليه فقط !!
مكانو غامض شوي ,. بس لو كنت ع الشارع العام << التحليه
خلي باتشي ع يمينك وراح تشوفيه بعده ع طول ,.


عمومآ اول مادخلت كان ع يمين الرسبشن اخذت عبايتي وجلست ع هالطاوله ,.
فيما بعد سميتها طاوله المناقشات ,.
لان كل زبونة لاحظت انها لازم تمر ع هالطاوله ,.
بعد مايعرفو طلبك ,. تجي الاخصائيه وتتشاور معك ايش حابه ,. ايش افضل لك
نعمل كدا والا كدا ,. كل دا يتم هنا هههههه
كنت توي مصحصحه جايتهم بالكوفي تبعي لووول
 خلصتوو وجلست اصور قبل تجي الاخصائيه ,.


بين كل طاوله تزيين والتانيه شاشه وحاطين فيها عروض الشعر تبع الصالون
كل فتره الصالون الاساسي بيعمل عرض لااخر صيحات الشعر ,.
من الوان ,. قصات ,.  تسريحآت وكدآ


حتى الرجال لهم من هالاحترافيه نصيب !! 
هذي الشاشه بيتعرض فيها لوكآت ,.
وكيف انتي تحصلي على هاللوك ,. بأستخدام منتجات توني اند قاي  


هنا المنتجآت بشكل اقرب 

شامبو ,. بلسم ,. رغوه شعر وسبراي و جل شعر وووووو 
كلو موجود عندهم تشوفك الاخصائيه وتفيدك بنوع شعرك والانسب لك ,.
حيكون لي تجربه لمنتجاتهم قريب ان شاء الله  ,.
المهم انه الاخصآئيه تبعي وصلت ,.
وفهمتها انه ابي اصبغ اومبري ستايل و اقص ,. يعني تغيير ستايل !!
طالعت بشعري قالت مصبوغ اسود
انا صرت كداااا قلت يسسس O_o
قالت ماينصبغ واذا صبغناه مايتفتح كتير ,.
جلست اتحايل فيهاااا بليز عندي مناسبه وووو
اتفقنا نعمل خصلتين تست لو فتح نعمل الصبغه ,.


جهزت الصبغه وبدأنا  ,. انسانه فعلا راقيه وحبوبه 
جلسنآ نسولف وقت الصبغ وكيف انه الصبغه السودا او البني الغامق قاسيه وصعب تخرج ,.
كمان نبهتني على الزيت ماينحط ع الشعر بس ع الفروه لانو بيغمق الشعر ,.
نسيت اسمها بس اظن انه خديجه بخش ,. الاسامي اعاني معاهاااا
وجلسنا ننتظر النتيجه ,.


لابد من التشك التشك ههههههه
عاجبيني كيف يهتمو باادق التفاصيل ,. كل شئ مطبوع عليه اسمهم !!

الشئ التاني اللي فعلا فعلا عجبني نظافتهم !!
اي فرشه تحتاجيها تفكها لك من البلاستيك تكون مغلفه ,.
بعد ماتستخدميها تنزل للتنظيف والتعقيم بحيث مايصير عدوى من شعر لشعر 
قشرة او اي مشاكل اخرى ,.  


خلص الوقت ورحنا نغسل الشعر ,. 

هنا كنت ببكي لون الشعر صار لونين ,.
من الجذور لبعد 6 سم تقريبا فتح ,. الباقي غامق وقالب ع نحاسسسي سيئ !!
فااعطتني حلين ,. احلاهما مر :(


اما اسحب لون كاااامل و ادخل تحت هالجهاز الحراري 
و ارضى باللون النحاسي وهي تحاول تطفيه  ,.
واما ابقى بالشعر الاسود !!!
ماشاء الله عليهااا حست اني انقهرت جلست تواسي فيا ,.
انتي اللون الاسود عليكي جميل ,. لايق لك والله خليه كداا
وهذا اللي صآر رجعنا صبغناه غامق وح اخليه اسود ,. لفتره من الزمن !!
ماحبيت اطلع وانا ماعملت شئ ,.
فخليتها تقص لي اطرافو و تدرج لي الخصل يعني زبطت فيه ,.
جلست اتلقف واسأل فين درستي وكدا ,. لانو لاحظتها مرررا فاهمه شغلهاا
طلعت تاخذ دورات بلوريااال و ويلا ودورات من الصالون نفسسه
وخبره عمل كمان
برضووو نفسي ماهانت علي اقص وامشي ,. فعملت حمام مغربي ,. 


الدور الارضي للقص والصبغات 
وطلعت للاول ,. السبآآآ 
هذا اللي محتاجتو بعد الاحبآط !! 


اول مادخلت استغربت ,. اضاءه الدور دا كلووو بالاخضر 
برضوو لون مرخي للاعصاب ,. فسامحوني لو إن الوان الصور شوي مو واضح 
عشان الاضاءة خافته و خضراء ,.  
الجدار كامل مغطى بخشب البامبو !!
طبعا الدور كلوو ريلاكسينق ميوزك ,. واصوات طبيعيه ,.
صوت المويآآآ انا اتخدر عليها ,.
لدرجه قبل فتره كان عندي ميني شلال بغرفه نومي !!!

  قسم البديكير 3>
وهنآ المانيكير ,. جداااا رايق
مايستخدمو الا ماركات معروفه ومشهوره جدااا o.p.i اغلب مناكيراتهم و essie  


 وهذي الكريمآت اللي بيستخدموهآ  



بعد كدا نروح للبهاما ههههههه
في غرف عباره عن اكواخ ,. ولما فتحت الباااب

طلعت غرف المسآج ,. تجنننننن
لوازم المسآج ,.  
المنظر لحالووو يخليك تسترخي غصب ههههههه


الدور دا مافيه كراسي للانتظار ,.
كلهاا عباره عن سلات تتمرجحي فيهاااا يالله كيف جوهم رايق !
بهالوقت كانو يجهزو لي الحمااام ,.

نهايه الممر الحمام بس اضائته مختلفه ,.
الغرفه اللي تغيري فيهااا وفيها المرواش كاخر خطوه اضائتها حمرررا رومانسسسيه لابعد حد ,.
صغيره مافيها الا مرواش وكرسي وقباله مجموعه كريمات وزيوت ,.

غيرت ملابسي وانقطعت عن التصوير والعالم هههههه
 اللي عملت لي اسمها فاطيمه مغربيه ,. عليهااا شغل رهييييييب ,.
تفرك من قلب ومرررا طيوبه
اخر خطوه بعد الفرك والبخار حطت لي طين مغربي لونو احمررر !!
فقالت لي فيه بودره دم الغزال ومسك وخزامى ريحتتتتته تجنننن تجنننن
خلتو علياا حوالي 15 د وخلصت الحمام

لما رجعت غرفتي لقيت عند المرواش شامبو وبلسم وصابونه بالطين المغربي
طبعااا دا منظرو بعد ما استخدمتوو ههههه .,
شعري مرررا حاسه فيه ترطيب راح ارجع اسالهم ايش البلسم والشامبوو

فاكرين الكريمات اللي بالسله  ., جاء وقتهاااا
حاطين 4 انواع
كريمين واحد بالعسل والبرتقال و واحد بالعنبر
وزيتين للجسم بالورد والخزامى و واحد اتوقع بالبرتقال برضو
حاولت اصور الكتابه ابدا ماقدرت الاضاءه خافته جدااااا
ترا دا رافعه الايزو كثير والا ماكان وضحت !!
<< للمعلوميه مناكيري اللبني الاخير من ريميل لونو مع الاضائه لاتعليق هههههه
اخترت زيت الجسم بالخزامى حبيت ريحتو هاديه وحسيت جسمي محتاج ترطيب زيتي شوي
مسحت جسمي بشكل لطيف ,. كنت مبلوله اساسااا وبشرتي بسرررعه امتصتو
وخلاص طلعت ,.


هدااا الحمام جيت بااصورو لقيتهم ينظفونه .,


اضائته مرررررا رايقه حبيتها كل بعد فتره تتغير لونها والغالب عليها ازرق رايق .,
مررررا هادئ هالمكان


جلست متكومه هنااا زي البسه هههههه
 كنت مرررا بردانه وخادره ومع صوت المويا تكه واناااام ., هههههه




وانااا خارجه شفتهم عارضين الكريمات اللي فوق .,

توقعت اني زبطت الصوره وبانت الانواع بس ماااش ماوضحت للاسف ,.



تجربه جدااا جميله ,.
صالون مررررا محترف والعاملات ودودات بشكل كبير !!
يعاملوكي كأنك برنسس والابتسامه دااايم ع وجههم ,.
جداا حبيته ,. واكيد لي عوده لهم
بالنسبة لااسعارهم اشوفها معقوله على هالخدمه الجميله والرفاهيه ,.
سعر الحمام المغربي ب 250 ريالز
والقص عملتو 150 اتوقع مع التنشيف ,.
اتمنى يعجبكم الريفيو ,.

8 comments on "صالون / رائي وتجربتي مع صالون TONI & GUY "
  1. حبيت وصفك وشرحك. شهيتيني اسوي مثلك (:

    ReplyDelete
  2. الله الله وش هالجمال ، تقرير جمييييييييييييل .. والاسعار بلاش ، بنسبه ل لون شعرك نفس شعر اختي بالضبط
    سوت له تفتيح في البيت من قارنيه وبعد اسبوع اصبفت اللون اللي تبيه في الصالون وطلع معاها اذا بتسوينها ف انصحك لاحد يشوفك بعد م تسوي تفتيح في البيت لان لون الشعر حيكون نكته هههههه بس ترى مو شرط تنتظري اسبوع يعني ثلاث ايام تكفي عشان تصبغي اللون الجديد ، وربي يعطيك العافيه ويسعدك

    ReplyDelete
    Replies
    1. خدماتهم ببعض الخدمات مرتفعه والبعض اشوفها مناسبببه
      وشعري مااظن لانه هي سوت لي تفتيح ومامسك اسود اسسسسود ياكافي هههههه
      شرفني مرورك ياجمييييله

      Delete
  3. جميل بشكل ! ماشاء الله عليكي يا شيخه ☺ ! بس ممكن رقمهم ؟ ابا احجز من عندهم انا كمان .

    ReplyDelete
  4. بصراحه حمستيني اروح ، بكم الصبغات عندهم ؟

    ReplyDelete
  5. من الاشياء المهمة جدا في حياتنا جميعا النظافة وهي شئ مهم جدا في حياتنا التي بدونها سوف تاتي الامراض الكثيرة والشديدة ويجب ان نهنم بالنظافة وازى اردنا النظافة نختار شركة تنظيف بالجبيل للنظافة العامة وازى كنا نختار نظافة معينة مثل مكافحة الحشرات ولدنيا شركة مكافحة حشرات بالجبيل وازى كنت تريد رش مبيدات فلدينا شركة رش مبيدات بالجبيل اما ازى كنت تريد نو اخر من النظافة مثل كشف تسربات المياة ومكافحة النمل الابيض وهو نوع من انواع الحشرات التى تجلب الامراض الشديدة فلدينا شركة كشف تسربات المياه بالجبيل وشركة مكافحة النمل الابيض بالجبيل ولدينا لجميع المناطق على حسب طلب حضراتكم
    وللتصال وطلب الخدمة اتصل ب 0508400941

    ReplyDelete

Auto Post Signature

Auto Post  Signature