رائي وتجربتي مع منتجات المكاداميا و البيوتين في العناية بالشعر ,.

Tuesday, February 25, 2014


’,


مرحبآ ,. 

ونكمل سلسلة مواضيع العناية بالشعر ,.
البوست الماضي كان شوية فلسفي عن الصبغات وطريقة اختيارك للون 
ماتكلمت فية كثير عن كيف تصبغي ولا ايش افضل الصبغات ,.
لان زي ماقلت هالشئ راجع للون الشعر نفسة صعبة تقولين لي لون شعري جاي كدا على كدا
و اعطيك منتجات تشترينها وتتوقعي راح يزبط اللون !!

الصبغ بيحتاج الاخصائية تشوف لون الشعرة حاليا ,. 
تاريخ الشعرة وايش الصبغات الماضية اللي مريتي فيها 
و درجة صحة الشعر او تضررة
كلها اشياء بتتحكم بمدى نجاح صبغتك الان ,.

عموما اليوم بتكلم بس عن المنتجات اللي جربتها طووووال الفترة الماضية مابعد صبغة شعري للان
ايش اللي فادني وايش اللي مش ولا بد ,. 


منتجات مجموعة الماكاداميا ,. 

هالمجموعة انتشرت بشكل مو طبيعي 
احس صارت الحلم الوهمي لااغلب البنات 
صبغتي شعرك , تبي تعالجية مالك الا الماكاداميا !!!!
الكل بينصح فيها عمال على بطال ,. 
فقلت خليني اجرب واشوف ,. 
كعادتي المنتجات الجديدة مااشتري احجام كبيرة ابدااااا
الا اذا كان هو الحجم الوحيد المتوفر ,. 
الافضل نجرب قبل مانتهور !

اخذت منتجين وهم :
كريم مغذي للشعر ويستخدم بعد الاستحمام ,. بـ 49 ريال 
والزيت المغذي للشعر و يستخدم قبل او بعد الاستحمام ,. بـ 28 ريال

بالنسبة للكريم المغذي ,. 
امممم القوام مثل اي كريم مغذي بس على اثقل شوي 
اثقل من بديل الزيت من بانتين حبيب الملايين لوول
فكمية بسيطة تكفي الشعر كلو 
و لو صرتي كريمة حتلاقي الشعر لزق ببعضو ,. 
طبعا مستحيل احط منو وانا عارفة بستشور لانة زي ماقلت يلزق بالشعر ,. 
استخدمة بالاوقات اللي شعري يرتاح فيها بدون سشوار بالبيت 
رائحتة جميلة جدا جدا و يقلل النفشة لانة ثقيل طبعا ,. 
بس ماحسيتة قدم لي اي علاج يذكر ولا شعري تحسن معاه نهائياااا 
مجرد كريم ينعم شعري بالايام اللي مابستشور فيها ,. 
انتهى ولا راح ارجع اشترية !!!

بالنسبة للزيت المغذي ,
يستخدم على شعر جاف او رطب ,. يعني قبل الاستحمام او بعدة
قبل الاستشوار او بعدة ,. 
يعني بااي وقت ,. 
الزيت جدا ثقيل قوامة يشبة زيت الخروع والا اقلكم لاتكرهونة لووول
قوامة يشبة سيريوم كريستال ,. 
وجدا غالي يعني هذا اللي عندي 10 مل لو بزيت شعري فية احتاج من دي 20 حبة بالقليلة !!
اصلا مااحسة مناسب للتزييت 
مجرد مسحة منة بعد الاستحمام تعطي شعري لمعة مثل لمعة السيريوم و تخلي ريحتة تجنن تجننننننن
و احسة نعم لي اطراف الشعر و جميل جداااااا جداااا بعد السشوار يقلل النفشة ويعطي لمعه وريحة رائعه 
قبل لايخلص اشتريت واحد ثاني لووول
وفي منة حجم اكبر 

في مرة اعطوني نزية عينات لكل مجموعة الماكداميا وجربتها 
بالنسبة لي احس الكلام اللي يقال عنها مبالغة 
مجرد مجموعة عادية للعناية و رائحتها جميلة ,. 
( يمكن اغير رائي في يوم ما لو جربتها بااحجام اكبر




افضل علاج وتغذية للشعرة هو البيوتين !!
البيوتين هو فيتامين ب 7 ,. 
تقريبا كغذاء موجود بااغلب الاطعمة اللي ناكلها ,. 
بس قريت في اكاونت الدكتور عمر سليمان انة رااااائع للشعر لو اخذناه كمكمل غذائي 
وكشامبو وبلسم لعلاج الشعر ,. 
وهذا اللي سويتة ,. 

رحت لـ GNC ارمال 
واخذت مكملات غذائية بيوتين بقوة 300 وخلصتها واخذت بقوة 500 وخلصتها
الدكتور عمر وصى بقوة 10.000 و قال انه مالها اي اثار جانبية وسألت برضو الاخصائي الموجود بارمال قال مالة اي اثار
بس وسوست شوي خصوصا ان الرقم مهوووول 
وانا كنت اخذ اللي بقوة 500 حبتين يعني 1000 باليوم 
عموما ماحسيت بكثير فرق بشعري ولا حتى طول اكثر من معدلة الطبيعي 
والمفروض ان الاظافر كمان تقوى لانة برضو ياثر عليها
وكمان هالشئ ماحسيت فيه!!!
افكر اراجع نفسي بسالفة الـ 10.000 بس طبعا راح اسأل دكتور بالاول 

عموما نرجع لـ شامبو و بلسم البيوتين ,. 
طبعا الاثنين اللي فوق بالصورة هم بلسمين !
لاني من فترة ماعاد القى الشامبو تبع هالمجموعة هو نفسة يكون بس الغطاء اخضر ,. 
وصرت استخدم برضو واحد ثاني من عندهم بس عبوتة صفرا ومكتوب علية بالاحماض الامينية !

عموما كل منتجات البيوتين اللي جربتها حسيت معاها بالتالي:
الشامبو مايرغي ! بالاضافة انة ينشف الشعر جدا 
يخلية ميبس و ناشف !!
ولازم من البلسم بعدة و كريم بعد الاستحمام و الا مايتمشط الشعر ,.
وهذا بالنسبة لي عيب كبير مع انة ممكن يكون ميزة لان المواد اللي تخلية الشامبو يرغي و خفيف 
مضرة بالشعر و اغلب الشامبوهات الطبية تكون بنفس النظام لخلوها من هالمواد

البسلم !
كان اوكي الى حد ما ترطيبة مو قوي ولا يزيت بالشعر او يدهن فية 
و اوقات احس يبي لي ترطيب اقوى بما ان الشامبو جدا ينشف ,.
بس ككل المجموعة استمريت عليها فترة طويلة مايقارب ال 6 شهور مااستخدم غيرها نهائيااااا
الاحجام اللي بالصورة ترا مهوولة جدا ,. كبيرة العبوة وتكفي لوقت طوووويل 
سعر كل واحد 50 ريال اظن او اقل 

بس بهالفترة لاحظت شعري لما استشورة يكون صحي اكثر ,. 
مع انه ناشف حتى بالاستشوار يبين 
بس زيت الماكداميا يحل الوضع و كم سيريوم اخر برضو

راح ارجع اشتريها ؟

مااظن بصراحة ماشفت منها شئ واااااااو 


البوست طويل شوي فـ حاكتفي بهالقدر ,.
وبالبوست الجاي راح اخبركم عن منتجات عادية نلاقيها بكل مكان 
بس مانعطيها اي اهتمام و فادتني جداااا
انتظروني ,.

دمتم بود  


3 comments on "رائي وتجربتي مع منتجات المكاداميا و البيوتين في العناية بالشعر ,. "
  1. اهلا اماني
    بوست مميز كعادتك
    شكرا لك

    ReplyDelete
  2. هلا موني
    انا جربت شغلتين من مجموعه الماكاديما
    جربت الماسك وبصراحه مميز جدا ، احس شعري بعده كانه زبده من النعومه ، انا شعري دهني باستخدمه بس باطراف الشعر ، واحسه مناسب جدا للشعر الجاف والمصبوغ

    وجربت الزيت احط منه نقاط على الاطراف عشان يعطيني لمعه حلوه
    والبايوتين كتبت لك تجربتي المختصره بالانستقرام

    ReplyDelete
  3. سلام..كنت ابغى اعرف من وين اجيب زيت الماكاديما دورت عليه كثيير ومالقيت

    ReplyDelete

Auto Post Signature

Auto Post  Signature