تجهيزي لعرسي : الجزء الثاني ( العناية في الصالون ! )

Tuesday, June 09, 2015

مرحبا


بوست اليوم عن الخدمات الصالونية اللي عملتها قبل زواجي 
اول شئ عندي نقطة لازم اوضحها قبل ندخل بقلب الموضوع ... 


العناية بالجسم او البشرة المفروض ماتكون بشكل متقطع !!
يعني مو تهملين نفسك طوال حياتك وقبل الزواج بشهرين او حتى ٦ شهور تهتمين وتتوقعين راح تلاقي نتيجة كبيرة  .. لا !
الاهتمام المفروض يكون بشكل مستمر و دوري طوال الحياة 
ممكن تكثفين عنايتك قبل زواجك ، بس مو للأسف تكون هذي اول تجاربك مع جسمك وتبين النتيجة !
اهتمي من اليوووم مهما كان عمرك... حمام مغربي لو بالبيت بين كل فترة وفترة ، سكراب للجسم اسبوعي والترطيب يومياً 
بكذا تضمني اغلب مشاكل جسمك راح تنحل مع مرور الوقت 

كثير بنات سألوني باقي على زواجي شهرين و عندي مشكله الركب السمراء 
من قال لك انو انا قدرت افتحها بشهرين !!! 
ولا انتي راح تقدري كمان 
هالشيء يبي له عمر ووقت طويل غير انه كثير من الدكاتره قالو هالمشكلة جينية ومالها علاج يشيلها ١٠٠٪
بس الترطيب والتقشير المستمر يخلي لون الجسم اجمل وفيه لمعه صحية وهالشئ يشمل الركب 
ف حاولي تلاقين علاج عند دكتور لو جداً غامقه اما لو لون بسيط هالشئ ماراح يروح بفتره بسيطة قبل الزواج 
عموماً مابي اطول بهالنقطه لان موضوع اليوم بسسسس عن العناية وبكجات العروس اللي في الصوالين 

،

 قبل زفافي بفترة الى حدود شهرين كنت مخططه ان الشهر الاخير اللي هو ابريل بما ان زواجي كان في مايو 
يكون شهر فقططططط لنفسي ،، اكون مخلصه فيه ٩٩٪ من تقضيتي و من الشغلات المهمة 
ويكون هالشهر بس للصالون ولنفسي وعنايتي بحالي ... 
لان مثل ماقلتلكم قبل ، زواجي كاملاً من و إلى كان كله كله انا اللي قمت بترتيبة
وهذا حطني تحت ضغط رهيب و ضيق بالوقت حتى عنايتي بنفسي قَلت الى اكثر من النص :( 
بدال مااكثف عنايتي بحالي اهملت بس مو اهمال لمجرد الاهمال ومافيا حيل.. 
حرفياً ماكان عندي وقت وكنت وقتها اشتغل كمان  :(
للتوضيح اقصد بالاهمال هنا اني بدال ماكنت اصلح حمام مغربي مرة الى مرتين بالشهر مثل قبل
صرت اصلحة مرة كل شهرين و بدال مااعمل ماسكات اسبوعية اعملها مرة كل اسبوعين ثلاثه 
تخيلو اني حسيت بفرق !!! 
غير اني مع جلسات الليزر بشرتي قلبت صحراء الربع الخالي :( 
مو معقول قد ايش ينشف الجسم الليزر يخليك ترطبين والا ماترطبين البشره شهباء ومسمرة:( 
فكنت محتاجة جلسات مكثفه مع عنايتي الدورية عشان ترجع بشرتي تتوازن من جديد 


 قبل الزفاف بشهر 

اتفقت مع صالون اوريانا اني اخذ بكج عندهم للعنايه بالعروس...
من بشره لجسم لشعر لاظافر كلو يعني لان الصالون بالفرعين موقعهم حلو
الاول ع البحر و الثاني داخل مركز لو شاتو بالتحليه وهالمركز جدا جميل تصميمه وحوالينه مطاعم احبها
و لإني مؤمنه ايمان تام ان الصالون للخدمات التدليليه فقط .. العلاج مو هنا العلاج بالعياده عند الدكتور 
مهما كان الصالون رائع وكبير وسمعه ماحيكون زي الدكتور نهائياً
ولاني ابي ادلل نفسي اخترت مكان حلو وواجهته حلوه عشان اغير جو لنفسي

عموماً عملت معاهم جدول كالتالي ...
كل يوم احد اروح فرع التحلية اعمل جلسات الجسم و الشعر 
وكل يوم اثنين اروح فرع الكورنيش اعمل جلسات البشرة 
لمدة ٤ اسابيع يعني ٨ زيارات للصالون 


 الجلسات اللي جربتها 

بالنسبة للبشرة خبرتهم اني ابي جلسات للترططططيب و النضاره و الاشراق فقط 
اتفقنا اني اجرب كذا نوع عندهم بكل جلسة ماسك غير لان بشرتي تحتاج كذا شغله على حد قولهم :)
مع ماسكات للعين بكل الجلسات ووافقت 

 جلسة فيتامين سي 

اول جلسة بدأت فيها بالبكج 
وهي عباره عن جلسه تنظيف عادية بالبخار و تقشير خفيف مع التدليك للبشرة
بعدها حطت لي ماسك للعين عشان الارهاق و التعب الماسك بارد وشعوره جميل جداً  ( صورة رقم ٢)
وبعدين حطت لي قناع طيني القوام لونه ابيض حطتة بس حوالين الشفايف ومنطقة الذقن 
خلتة ١٥ د وبعدها شالته وبدت توزع الفيتامين سي على كل البشره ماعدا العيون 
هو كان سائل كانه مويا بدأت بشرتي تحرقني وتقرصني طبعاً بسبب الاحماض ولانه يعتبر مقشر خفيف 
بعد فترة نص ساعه مسحتة وبدأت ترطب البشره وخلصت ..

انطباعي عنة : 
يمكن يكون له تأثير بسيط مع تكرار الجلسات بس انا سويته جلسه وحدة بس فما حسيت له اي تأثير 
من ناحية التقشير او تفتيح لون البشره 
ومع كون بشرتي جافة وناشفه وصارت حساسه جدا جدا الماسك ماناسبني 
وخلى خدودي حمررراء ملتهبه لكم يوم بعد الجلسة فما حبيتة ابداً 
لو حابة تقشري بشرتك احس مكانه العياده مع دكتور مختص افضل 
خصوصاً ان سعر هالجلسه ضعفين الى ٣ اضعاف سعر جلسه التقشير بالعيادة ! 
بس عملتها لانة ع حسب كلام الاخصائية انها تهيئ البشرة للجلسات العلاجية القادمة 

 ماسك الخلايا الجذعية 

ثاني جلسه وثالث جلسه عملتها هي الخلايا الجذعية 
هالجلسه حبيتها لانها تعطي ترطيب عميق للبشرة وانا عملتها كمان قبل مااخذ البكج للعرس من كم شهر 
وجداً حبيتها تبدأ الاخصائيه الجلسه بالبخار و تنظيف البشره و التقشير الخفيف 
بعدها تبخ لك اوكسجين ع البشره وتبدأ تحط الماسك يكون زي البلاستيك الشفاف هلامي الملمس ( صورة رقم ١)
تحطة على بشرتك وتخليك لمدة ساعه وبعدها تجي تشيله وترطب بشرتك بمرطبات مختلفه 
على فكرة المرة الثانيه بالبكج اضافت لي ماسك من عندها كانه حليب وشوفان (صورة رقم ٣ )
تقول انه للترطيب و تغذية البشره بشكل مكثف مع شد واضح بديل للبوتكس !

انطباعي عنة :
بشرتي جداً ترتاح له وتتشربه بعمق لان زي ماقلت صارت جافه اغلب الوقت 
يخلي البشره رويانه وصحية كانك شاربه ٣ ليترات مويا !! 
تلمع تلمع بمعنى الكلمه 
بس تأثيره محدود ومؤقت يومين بالزبط و ثالث يوم ولا كأنك سويتي شئ !! 
ف انصح فيه لعروس حابه تعمله يوم الزفاف راح يعطيها نتيجة حلوه لليله العرس والليله اللي بعدها بس 
او اللي عندها مناسبه مهمة وتبي شئ لو مؤقت يطلع بشرتها اجمل ... 
بالنسبه للماسك الابيض بالكولاجين و البوتكس ماحسيت بااي نتيجة ولو ١ بالمية !!

 ماسك الذهب عيار ٢٤ 

كل الجلسات الماضيه عملتها مع الاخصائيه شيرين احبها روحها مرحة 
بس هالجلسة عملتها مع وحدة تونسية اسمها ساره اظن 
عموماً الجلسه هذي كانت الرابعه و الاخيرة قبل زواجي بيوم كالعاده المفروض تبدأ بتنظيف الوجة بالبخار 
بس انا مافضلت هالشئ لاني عملت شمع لوجهي قبل ادخل عندها ( ترا ماعملت لوجهي ليزر )
فطلبت منها تكون حذره و بلاش من اي شئ حار او بخار للوجة 
بدأت بمنظف لطيف و جهزت ماسك العين اللي جربته في كل الجلسات وخلته لوحدة على عيني لمده ٤٠ د تقريباً
عشان بهالوقت تكون البشره هدأت شوي من الشمع 
وبعدها شالت ماسك العين وفردت على بشرتي ورق ذهبي خفيف جدا جدا لدرجة انه يتقطع ويتفتت 
هالورق هو ذهب عيار ٢٤ قيراط ( صورة رقم ٤ )
فردتة على بشرتي كامله مع العيون و خلته تقريباً ساعه مع توجية لمبة لونها موف على بشرتي
.. عموماً بعدها دلكت البشره حتى ذاب تماماً فيها 
رطبت بشرتي ومشيت 

انطباعي عنة :

عادي جداً !! 
الوصف اللي جاني عنة خلاني احس اني بطلع مثل بيونسيه في كليب 1+1 ههههههههههه
جداً عادي كاني ماعملت شئ لانضاره ولا لمعه ولا شئ بصراحه !
حتى تحسفت اني عملتة وماعملت الخلايا الجذعية :(
بالقليه يبان بالبشرة الترطيب
وسعره غالي جداً ١٥٠٠ ريال على مااذكر او ١٠٠٠ بس مو اقل من هالسعر
اظن الشهره بسبب اسمه انه ذهب فقط! 


 جلسات الجسم 

اول ماعملت البكج ،، في اول اسبوع عملت حمام مغربي عندهم بفرع التحلية
كان جميل جداً و اللي تشتغل يدها حلوه وتنظف من قلب صراحة 
دعكتني من قلب و طلعت بلاوي بلاوي هههههه ختمت الجلسه بالبخار للجسم و مويا ورد مع زيت عطري 
خلت بشرتي تقوطر نعومه وريحة تاخذ العقل 

عموماً هذي جلسه حمام مغربي عادي .. دعك وتنظف فقط .. تقريباً ب ٢٥٠ ريال على مااظن
على اساس الجلسات اللي بعدها بتكون بالاعشاب و مبيضه ووو وسعرها مختلف اغلى 
لما جيت الاسبوع الثاني على اتفاقنا مجهزة نفسي للحمام المغربي مع خدمات الشعر 
قالو بس حجزنا لك خدمات شعر و انتي ماحجزتي مغربي وعندنا ضغط مواعيد اليوم مانقدر :) 
واتفقت معاهم اعمله بكرا الاثنين في الفرع الثاني اللي تابع لهم مع جلساتي للبشره 
قالت طيب وببلغهم ولما وصلت ثاني يوم قالت اللي هناك معليش محد بلغنا وعندنا ضغط حجوزات مانقدر:) 
اعطوني ايام ثانيه ماتناسبني ولاتناسب ترتيب جدولي ف طنشت هالجلسه و غضيت النظر عنها 

جيت للاحد الثالث انا كنت شبة مزكمة و خفت مع الحمام و البخار و الرطوبه وبعدين اخرج فعلياً ازكم
فقلت لها انا مااقدر اعمله اليوم خلية الاسبوع الجاي او احد من اهلي يستفيد من هالجلسه قبل الزواج 
قالت خير و سويت بقيه الخدمات وطلعت 

جيت ع الاسبوع الرابع اللي هو ماقبل الزواج خلاص المفروض الحين اعمل راحت علي جلستين 
قالت لي عندنا ضغط مواعيد ولا اقدر لا اعمل لك موعد ولا اعمل لااي احد من اهلك مافيه احد فاضي !!
مع اني كنت اروح الصباح والصالون فاضي شوف عيني ولما اقلها فاضي الصالون 
تقول نفس اللي كانت بتعملك اجازتها اليوم !! 
مرا انقهرت اني ماقدرت اعمل بالبكج الا مرة وحدة بس حمام مغربي ولا حتى عوضوني عنه بجلسات جسم ثانيه
تقشير او اي شئ ثاني للجسم حتى ماعرفوني انه عندهم خدمات ثانيه للجسم !! 

المهم ماكنت فاضيه اتهاوش معهم و رحت صالون 7L قبل الزواج ب ٣ ايام وعملت حمام تركي فاخر 
اللي هو حمام مغربي بس فيه ماسكات للجسم اكثر وخلطات بس بالنهايه نفس تأثير المغربي نظافه و لمعه للجسم حلوة
انبسطت والله بشغلهم حبيتو بس احس لو عملت المغربي العادي لانه مافرقت الا بالسعر !!
العادي ٢٥٠ التركي ٧٥٠ !!!

عموماً عملت ٤ جلسات مساج وهذي جداً مهمة خصوصاً بعد الشوبينق الطويل للعرس :( 


 قبل الزفاف بيومين 

رحت اوريانا التحلية صبغت شعري كنت ابيه اسود مع ان شعري اسود هههههه
شعري بهت سواده مو اسود بلمعه انا اعشق الاسود اللي يلمع يالله قد ايش احبه :(
المهم اقنعتني خبيرة الشعر مِنة اصبغه بني غامق بس مو درجة البني الغامق اللي كانه اسود لااا
بني كانه شوكلاته مدري ايش اسم الدرجة بس مالاحظت انه مو اسود الا لما طلعت جذور شعري
وضح انه فيه لون بسيط يفرق عن شعري الاصلي !!
وكويس صراحة اني سمعت كلامها لانها قالت لي ماتعرفي يمكن بعد الزواج تبي تغيري وهذا اللي افكر فيه الآن هههه

المهم قصيت اطرافه كمان وانبسطت كثيرررررر على قصها حبيته ورجعت البيت زيته و رطبتة بنفسي :(
لاني كل مااقلهم ابي جلسات علاجية للشعر تقلي كيراتين وبوتكس ووو وانا جربت البوتكس وماحبيته كثير
ف طنشتهم وتصدقون للان ماادري ليش ماسويت عندهم ولا جلسه شعر !!! 


 يوم الزفاف 

جيت لوحدي لاني ماكنت ابي اي احد يوترني يكون معاي ههههههه
امي تقلي خذي اختك طيب تساعدك !! رفضت حبيت اروح لوحدي بهدووووء
رحت الساعه ٢ فطرت عندهم وبديت بأظافري بديكير ومنيكير مع ماسكات للرجول و اليدين
ولان اظافري كانت نقطه نقطه وابي فرنش مناكير اضطريت اركب اظافر
وليتني ماركبتها :(
ماادري الغراء كان ايش بالزبط مرا تعبتني لما نزلتها وتعبت اظافري وتكسرت من النص :(
اكثر شئ ندمت عليه بحياتي :(

بعدها عملت مكياج وتسريحة عندهم بس هذي راح اتكلم عنها ببوست خاص


 نصيحة 

لاتخبرين اي احد انك عروس ههههههه
الصالونات بيطلعون لك عيوب بحياتك ماشفتيها وبيقولون لك انها بتنحل لو اخذتي بكج ٦ حمامات مغربية !!
و بشرتك باهته ومافيها نضاره و شعرك ميت ومتقصف ومحتاجة كورس علاج مكثف قبل العرس
حرفياً بتتغير معاملتهم لك اول مايعرفو انك عروس وبيحاولون ياخذو المهر منك بكل الطرق الممكنه ههههههه
انا مرة غلطت غلطططططت وقلت لوحدة اني عروس بصالون ما ...
حاولت تقنعني بشتى الطرق اني اخذ اغلى بكج عندها تخيلو ٤ جلسات للجسم ب ٨ الاف ريال !!
رفضت بأدب و قلتلها على خير حبيبتي افكر وارجع لك
قالت بنبره حادة ... انتي عروس اذا ماعملتي الحين متى تعملي !!!
وقاحة مابعدها وقاحة !!!
عساي لاعملت ،، ترا مابيجيب نتيجة مستحييييل يجيب نتيجة من ٦ جلسات كانو العالم كلها عملتو
فلا تحسو بالذنب انكم ماعملتو وعروس وماادري ايش
لاحد يستغل مشاعرك لانك فرحانه بيوم عرسك وينصبك وياخذ فلوسك بغير حق !
صديقتي حتى مكياج وتسريحة فرحها ماقالت لهم عروس !!!
وجات ركبنا لها الطرحة بالقاعه وخلصنا !!!
والفرق عارفين طبعاً قد ايش العروس مكياجها ب الوف و المكياج العادي مع التسريحة ٥٠٠ الى ٧٠٠ ريال
وبالنهايه النتيجة وحدة !!!!
فخصوصاً البنات اللي ميزانيتهم محدودة نصيحة لاتعملي هالبكجات الفاضيه
وخصصي لنفسك يوم بالشهرين الاخيرة روحي الصالون اعملي حمام مغربي و اللي تبينه بسعره العادي
وكرريه كل اسبوعين راح توفري مبلغ كبيرررر ومو شرط صالون واااااو اي صالون راح يعملو نفس النتيجة

بالنهايه اتمنى تستفيدو من تجربتي
واختلاف الرائي لا يفسد معزتكم عندي ههههه



دمتم بود 
7 comments on "تجهيزي لعرسي : الجزء الثاني ( العناية في الصالون ! )"
  1. ربي يسعدها ويعطييها العافيه العروسة ❤️
    نفسي ارتب لي جدول للصالون قبل الزواج بس ماعرف ايش الي ممكن يكون ضروري والشيء الي بس دلع هههه
    يعني ماسكات الوجه مااعترف فيها قد جلسات التنظيف احسها اولى منها ، جيبي ماسك وسوي بالبيت كلها يومين ويروح مفعوله ، الحمام المغربي احس نفسي القى بكج اكثر من جلسة بمواعيدها بس من جد مررا ينصبون عشان يكسبون لو عرفوا انك عروسة ، المفروض كذا اي شيء للجسم وجلسات يتسوى عادي الا المكياج احس لازم تقولي انك عروسة عشان التصوير والثبات حتى الشعر عاديي مو ضروري كله نفس الشيء ، الله يعين كل عروس احس بتوتر وحوسة لما افكر بهذي الاشياء ��
    ربي يعطيك العافية والسعادة ياموني ❤️
    انتظر كل بوست مرتبط بهذي السلسة وغيرها اكيد ❤️

    ReplyDelete
  2. أحس حرام ضيعوا عليك جلسات عيال اللذين :(
    أنا بعرسي رحت لصالون واحد و ضبطوني من فوق لتحت مع المكياج و التسريحه طلع قريب الثلاثة الاف و الصراحة تسلم ايديهم لأن من جد شغلهم كان وااااو و جميل ، يعطيكي العافيه و الصراحة انصدمت إنه ماسك الذهب ماله نتيجة واو لأن حتى أنا اتخيل بطلع زي بيونسي xDD

    ReplyDelete
  3. حبيت البوست مررره ، بجد مفيد ومرجع لكل عروس
    يعطيك العافية ياعسل ..

    ReplyDelete
  4. كل ما أقرأ منك بوست اتجمس لأيام زواجي قبل 9 شهور اقول ليتها ترجع .. غعلا مع العناية ما احتجت الا كم حمام ماليزي وكم ماسك لشعري و وجهي وبس
    قبل زواجي صبغت شعري بني غامق اغمق درجة عشان يعطي شعري لمعة وكنت مقررة اغير شعري بعد زواجي بشهور بكذا اقدر اصبغة ثاني مره


    شكرا موني

    ReplyDelete
  5. يعطيك الف الف عافيية على هذا المجهود والله يوفقك على اني مو عروس بس احس اني استفدت من كلامك ونقطه مهمه ذكرتيها في بداية كلامك ان جميع مشاكل الجسم بتتعدل اذا الوحده اهتمت بنفسها وبشكلها وفعلا هذا الي صار معي بديت اهتم في جسمي قبل سنه ونص تقريبا والحمدلله تخلصت من الكلف واثار الحبوب بنسبة70بالميه هذا غير النعومه والنضاره .بس عندي ملاحظه زغيرونه لك انتي ليش دايما بتذكري التاريخ بالميلادي بس ابغى اعرف...ياليت لو تكتبيه بالهجري بيكون مقبول اكثر

    ReplyDelete
  6. الله يعطيك العافية مرره استفدت من البوست و كلامك مهم الله يسعدددك و يوفقك

    ReplyDelete
  7. يا حلوة يا جميلة، شكرا جدا ع الفائدة وتسلن يدك. انا من اهل الرياض وزواجي بالبحرين وعمري ما سويت مكياج كامل او في صالون، لقيت كذا وحدة قالو لي شعر ومكياج 3000 وصراحة المبلغ كبير بس تنازلت وقلت ليه لا.

    كنت قاعدة ابحث ايش الفرق بين المكياج العادي ومكياج العروس لقيت مافي فرق وخصوصا اني ابغى اسوي زي حق الاجانب مكياج عادي طبيعي جدا بدون لمعة والخ قالو مع التسريحة 800 ريال.

    وصراحة استفدت من كلامك ولا راح اذكر اني عروس

    ReplyDelete

Auto Post Signature

Auto Post  Signature