روتين عنايتي حالياً ... روتين رخيص وسهل للكسلانين !

Thursday, October 01, 2015


مرحبآ

اشتقتلكم كثير واشتقت للتدوين مرررا :(
هالفترة قاعدة افكر في حلول تخلي التدوين اسهل لي و اسرع ..
عشان لاانقطع عنكم كثير ، بفكر بشوية حلول تخلي التواصل بيننا اقوى
غالباً التدوينه تاخذ مني وقت طويل بالتصوير و الايديتنق و الكتابه و التنسيق بس تطلع وانا راضيه عنها ١٠٠٪
وانا ماارضى بااقل من هالنسبة لتدويناتي :((( وش الحل ياجماعة ههههه
،

عموماً اليوم بكتب لكم عن روتيني الحالي للعناية بكامل الجسم ..
بما ان لي فترة متكاسلة كثير عن عنايتي المعتادة فهالنظام بيكون ممتاز للي يمرون بنفس المود حقي او الكسولات ههههه
جداً مختصر ، سريع ، كل شئ متوفر بااي صيدلية او مول ماافية طلبات معقدة ولا منتجات غير موجودة بالسعودية
كمان اسعار المنتجات معقولة و بعضها رخيصة عشان الكل يقدر يشتريها ..
انا عندي قناعة إن النظام اللي يكون مختصر هو اللي يشجعك ع الإهتمام ..
من لها قلب تضيع يومها وهي بس تعتني مااتوقع فية !
يمكن فية ماادري ههههه

فبتكلم عن العناية بالجسم / الشعر / البشرة 
الاسنان كنت بتكلم عنها هنا بس فضلت افصلها ببوست ، لانكم لو شفتو المنتجات بتلاحظون اني اعاني من مشكله
فلازم اشرح لكم هالمشكله جات من ايش ... ترا هالسطرين قلك قلك تشويق ههههه
فالبوست الجاي مخصص للاسنان  و التبييض وكل هالشغلات

،


الجسم / Body 

زي ماقلتلكم هالفترة مالي مود خلطات وعناية بشكل مكثف مكتفية بالاساسيات شئ سريع و يؤدي الغرض ..
فأختصرت السالفة واخذت لي شاور جل ريحتة تعجبني ومعاه الزبدة الخاصة فية للترطيب بعد الحمام ..
عن نفسي اعشق اعشق مجموعة البابايا من بودي شوب .. جدا احبها احس ريحتها مميزة
مع انو دايم القاها مكومة بمواسم التخفيضات احس محد يشتريها غيري ههههه
ترطيب الزبدة جميل جداً والشاور خفيف للحمام اليومي ..
الزبدة ب ٧٠ ريال و الشاور جل ب ٥٠ ريال في الايام العادية
انا اخذتهم الاثنين في موسم التخفيضات ب ٥٠ تقريبا ً


تقشير الجسم ضروري مرتين اسبوعياً مهما وصل فينا الحال بالكسل هههه
حالياً استخدم مقشر ستيفز بالمشمش هذا يعتبر من التوب عندي ولاينقطع من بيتي ..
تقشيرة رهييييييب حرفياً ، انا احب المقشرات اللي واضحة حبيباتها و يكون فيها شوية خشونه لما تفركين ..
المقشرات اللي كأنها زبدة وخفيفة مااحبها احس اني ماتنظفت هههه
فاللي يصير اول ماادخل الحمام ارش على جسمي بيدي شويه موية .. بس شوووووية
عشان الجسم يكون شبه جاف وابدأ احط المقشر وافررررررك
لإن لما يكون جسمي مبلل مااحس المقشرات تجيب نتيجة ..
بعدها اغسل جسمي بمويا حارة وانزل كل المقشر و اختم الترويشة بمويا باردة تقفل المسام
يخلي الجسم نااااااعم و يشيل لك اي قشور سطحية التصبغات مع الاستمرار بتخف

هذا المقشر كاااان بكل سوبر و كل صيدليه حالياً صرت ماالقاه الا بالدانوب فرع الصيرفي :(
ب ٣٠ ريال او اقل


بعد الاستحمام ارطب جسمي بالزبدة زي ماخبرتكم فوق واحط الديودرنت ..
استعمل بيزلين او ريكسونا الاثنين كريمية .. مااحب البخاخات ابدا ابدا :(

بيزلين .. 

يعمل طبقة كريمية كثيفة ومايمتصها الجلد بسرعه .. لدرجة احطة واخلية دقيقة تقريباً واشيل الزايد بمناديل :(
بالاضافه الى ان بيزلين هذا اللي بالاعشاب ريحتة مااعرف كيف مااستلطفتها احس مو فرش
 فاضطر احط بعدة دهن مسك ( الشرح بالصورة الجاية )  ..
فية منه انواع ثانية كمان جربتهم .. النوع العادي منة افضل بكثيرررر يكون مالة ريحة ..
كل منتجاتهم بالديودرنت مكتوب عليها تبيض المنطقة و هذي يمكن العبوة السابعة وماشفت انه فتح ولو شئ بسيط ..
و كمان من اهم عيوبة ان سعرة كل ماله بإرتفاع ...
كان ب ٤٥ ريال صار ب ٥٠ و بعدها ٥٥ و بعدها ٦٢ و الان ٧٠ ريال :( الله يستر من الجاي

ريكسونا ..

جربتة مؤخراً و اللي اخذتة برائحة الباودر رووووعه كأني حاطة باودر اطفال بيبي جونسون
ينشف بسرعه ومايبهذل الملابس ، جميل جدا و فعاااال .. حبيته بصراحة وسعره اظن اما ٩ او ١١ ريال
تنطبق علية جملة ( نظافة ريحة توفير ) ههههههههه


دهن مسك روز من اجمل للعطور ..
هذا استخدمة في الشعر و ثنيات الجسم ومن ضمنها الاندرارمز و على اطراف البكيني وبين الصدر ..
بنات حرفياً لو حصل وعرقت اشم ريحة المسك ثاااابت لدرجة يمسك فيا و في ملابسي و ملابسي الداخلية
ريحتة انثوية ناعمة جدا وغير مزعجة لانه مسك بالروز ( ورد )
عن نفسي جربت كثير انواع مسك و من محلات مختلفة .. مسك طهارة و عادي و الاسود و كثير كلها حسيتها مزعجة
ماعدا ذا جداً ناعم و يحلى اكثر مع العطور

من اجمل الربع تولة ب ١٥ ريال


اختم العناية مابعد الشاور بهذا الكريم للاقدام .. من افضل واجمل ماجربت فعلاً غير رجولي ١٨٠ درجة
خصوصاً بعد ماقشرتها بالمقشر الياباني و حسيت بعد فترة انها تصحرت مو جفت :(
فهذا الكريم رجعها ناعمه ناعمه بمعنى الكلمه
احط منه يوميا بعد الشاور و احيان ازيد فوقه شوية من زبدة الجسم والبس شراريبي
ثاني يوم الاقي رجولي حررررير رطبة وندية وناعمة
اشكر البنات اللي دلوني علية لما اشتكيت من خشونه رجولي بالسناب
شاكرررررة لكم حبايبي ...

تلاقية بااي سوبر ماركت و اي صيدلية سعرة بين ١٢ ريال - ١٥ ريال حسب المكان

،






الشعر / Hair 

من الشغلات اللي راح اكتب عنها تدوينة قريباً هي الشعر ... 
صبغت شعري بنفسي وغيرتة من الاسودالفاحم للاش بلوند .. 
راح اكتب لكم بالتفصيل وش سويت بالزبط في تدوينة خاصة 
عموماً هالشئ طبعاً طبعاً تعب شعري كثير وصار جاف و ناشف و مقصف الاطراف ..
جربت كثير شامبوهات ابي شامبو لطيف ، يرطب الشعر وماينشفه خصوصاً مع الاستخدام اليومي .. 
مافي شئ ريحني زي غارنية الجديد ممتاااااز 
تقريباً هذي رابع عبوة استخدمها .. الشامبو كانة بلسم بس يرغي !!  
من جد يرطب الشعر وماينشفة يعني اتوقع اللي شعورهم عادية ماراح يحتاجو معاه بلسم اصلا 
جربت مجموعه العسل و مجموعه الافوكادو الثنين ممتازين للشعر الجاف و المتقصف ..
بس حسيت الافوكادو افضل و اكثر ترطيب .. وراح ارجع له بعد مااخلص شامبو العسل 
البلسم حقة خفيف ومايدبق او يلزق بالشعر ولا يطيحة 

الشامبو الصغير ب ٩ ريال والكبير ب ١٣ تقريباً و البلسم نفس السعر 



زي ماقلت لكم شعري صار جاف فصرت احتاج حمامات زيت بشكل اسبوعي
فهالمنتج ساعدني كثير الين شعري وارجع له رطوبتة ونعومته .. هو بزيت المشمش ، وفية مجموعة فيتامينات
لون المنتج برتقالي وللاسف عدم لي مناشفي لان لو ماغسلتية كويس كويس من الشعر بيبقع في المناشف
بس فداه المناشف كلها المهم يرطب الشعر ههههههه
احطة مرتين بالاسبوع على كامل الشعر ماعدا الجذور بعد مااغسل شعري بالشامبو و البس الكاب البلاستيك
انتظر حوالي ١٠ د واغسلة فعلاً حسيت فرق بالنعومة بعد استخدامه

موجود بكل سوبر ماركت وكل صيدلية ، الطويل وهو يعتبر الحجم الصغير ب ١٥ ريال
و العلبه المدوره الحجم الوسط بحدود ٢٥ ريال 



الوجة / Face 

خطوة التنظيف مافيه منتج معين هو من روتيني حالياً حسب مزاج بشرتي انظفها ..
اذا دهنت منظفات كلينك الجأ لها او بايوديرما و بعض الاوقات حتى المنظفات البسيطه بالحليب اتحسس منها :(
فصايره استخدم اقل عدد من المنظفات مادمت مااستخدم ميكأب كثير او اتعرض لملوثات جوية ..

التونر مااغير عن كلينيك من اجمل ماجربت ومرتاحة علية جداً
رقم ٣ هو للبشرة المختلطة يقفل المسام ويطهر البشرة اصلاً ريحتة كأنة معقم ههههه
 جميل جداً واشوفة خطوة اضافية للتنظيف

استخدم بعدة حالياً الخطوة الجديدة من نظام كلينيك اللي هي لوسيون البشره من مجموعة Even Better
اللي عندي رقمة ٣/٤ يعني للبشرة المختلطة للدهنية  .. ورقم ١/٢ يعني للبشرة الجافة للجافة جداً
 هو عبارة عن ماء منعش للبشرة  فية مواد مغذية و مقاومة للتجاعيد و يفتح البقع يعتبر خطوة ممتازة قبل الترطيب
تاخذين منة شوي بيدك وترشينة على البشره .. صعب في الاستخدام صراحة لو إنة بخاخ كان افضل
هو مصمم للبشرة الاسيوية فقط و يحل مشاكلها .. ماحسيته قدم لي شئ كبير بس بستخدمة للنهاية واشوف

الاثنين تلاقوهم في اي كورنر لكلينيك بحدود ١٣٠ ريال لكل واحد اتوقع


الترطيب حالياً استخدم هذا بفيتامينات E , A , D من ارمال
المرطب يعتبر خفيف مررررا اشوفه يناسب اللي بشراتهم دهنية الى مختلطه
انا احط منه طبقتين و يادوب ، بشرتي صايرة جافة شرهة هههه
بس حسيتة جميل ، خفيف و لا فية روائح مزعجة و لاعطور

تلاقوة ب ارمال GNC ب ٣٠ ريال 




 منتجات وقت الازمات ..

هذا المنتج عبارة عن جل مبرد للبشرة بخلاصه الصبار ..
استخدمه بعد مااشيل شعر الوجة بالواكس او الشنب بالفتلة يبرد على البشرة ويخفف من الاحمرار و التهيج
ممتاز لبعد جلسات الليزر ، بعد التانينق او التسمير و حروق الشمس و الحروق عامة
ممتاز للسعات التشقير و صبغ الحواجب
مااستغني عنة صراحة هو وميبو للحروق بس هذا لتهدئه البشرة خصوصا بعد الواكس مايصلح ميبو ابداً

اخذتة من الصيدلية الوجودة عند روائع المكتبات في شارع الامير سلطان ..
مااعرف اذا متوفر بكل الصيدليات او لا
سعرة ٧٠ ريال



بقية مستلزمات الازمات .. من اليمين لليسار 

مرهم الاسد ههههه محد ينطق فيوسكورت انا متأكدة كلنا نسمية مرهم الاسد ..
اللي بخطين احمر و اصفر هو مضاد للالتهابات
استخدمة دايركت بعد الليزر او الشمع واخلية كم دقيقه بعدها احط جل الصبار 
لمدة ٣ ايام فقط مو اكثر لانة يحتوي على الكورتيزون 
موجود في كل الصيدليات ب ١٥ ريال اظن 

اللي بالنص الدوكين ٤ وهو مبيض للبقع و اللي بعده بيجمانورم مقشر ومبيض بنفس الوقت 
مااستغني عنننننننننهم 

الا ماتطلع لي حبة وخصوصاً وقت البيريود او بعد الواكس وبعد ماتروح تصير بقعه بنية 
البيجمانورم يقشعها خلال كم يوم هههه و الديكاوين يساعد على تفتيح الاثر برضو 
فااستخدم البيجمانورم بالليل على الحبوب او البقع و الصباح الدوكين وبعده ارطب 
ممتازين لاثار حب الشباب للتصبغات و الكلف و اي بقع بالبشره وحتى لتفتيح الركب والاكواع 

احيان استخدمهم لمدة اسبوع فقط لتجديد البشرة يخليها ناعمة صافية ومشرقة  
بس انتبهي البيجمانورم مقشر يعتبر قويفكوني حذرة عند استخدامة ... 
لايستخدم على الحبوب بس على الاثار ، لايستخدم في النهار فقط في الليل و بالظلام 
لاتتعرضين للحرارة او الشمس وقت استخدامة وان كان لازم ولابد تخرجي لازم تستخدمي واقي بنسبة قوية
حاولي ماتستخدمينة كل يوم لانة بعد ٣ يوم بيكون وجهك تقشر بشكل واضح 
استخدمية يوم اي ويوم لا وبكميات بسيطة 

موجودين بكل الصيدليات ... 
البيجمانورم ب ٦٢ ريال 
الدوكين ب ٣٠ ريال اظن 


دمتم بود 

31 comments on "روتين عنايتي حالياً ... روتين رخيص وسهل للكسلانين ! "
  1. يعطيك العافيه ماقصرتي ♡ ♡

    ReplyDelete
  2. انا مجربه الشامبو والبلسم بالافكادو مرااا تماام 👍
    ويعطيك العافيه 💜💜

    ReplyDelete
    Replies
    1. مشكورة على ذكر تجربتك

      Delete
  3. موضوع جميل..سلمت أناملك ❤️

    ReplyDelete
  4. جمممميل جداً
    تحمست للشامبو بصراحة
    و لمرطب الوجه

    ReplyDelete
    Replies
    1. جميل الشامبو لو شعرك جاف بتحبينة
      شاكرة لك حبيبتي

      Delete
  5. حبيت ان كلها أشياء بسيطه وتتوفر في كل مكان الله يسعدك حبيبتي

    ReplyDelete
  6. حبيت البوست و ألهمتيني كثير
    <3 <3

    ReplyDelete
  7. وحشتني مدونتك لازم تلاقي حل من جد هههههه
    جذبني الشامبو ناوية اصبغ ومتخوفه من التلف الي ممكن يصير بعدها وشكلي بصاحبه
    اخر حزئية من البوست هي المفضلة من جد تجدد البشره بشكل جميل 😍

    ReplyDelete
    Replies
    1. ياقلبي انا والله جاري التفكير بحلول سريعة ههههه
      شاكرة مرورك الجميل

      Delete
  8. عجبني الشامبو و البلسم مرة ، شكرا على البوست الرائع

    ReplyDelete
    Replies
    1. الشكر لتفاعلك ياغاليه

      Delete
  9. روتينك شامل وسريع
    يعطيك العافية على البوست ياعسل
    استمتعت وأنا أقرأ ..

    ReplyDelete
  10. يعطيك العافيه جميله التدوينه خفيفه لطيفه

    ReplyDelete
  11. تقدم لكم شركة تنظيف منازل بالجبيل الشركة الاولي بالجبيل لتقديم خدمات التنظيف الشاملة لجميع اركان المنزل وكل ما يحيط به فمع شركة تنظيف منازل بالجبيل تستطيعون الحصول علي افضل خدمات تنظيف المنازل والشقق والفلل والبيوت والقصور والمجالس والكنب والسجاد والموكيت بالجبيل والمنطقة الشرقية وكل هذا من خلال فريق مجهز ومكون من افضل العمالة الماهرة والادوات المثالية للتنظيف والاجهزة الحديثة المستخدمة في تنظيف المفروشات وجلي البلاط بالجبيل والمنطقة الشرقية , فعندما تبحثون عن شركة تنظيف متميزة فانتم بحاجة الي شركة تنظيف منازل بالجبيل - شركة المثالي جروب ااتي تعد الشركة المثالية للتنظيف بالجبيل فتوفر الشركة الخدمات الاتية للتنظيف

    شركة تنظيف منازل بالجبيل
    شركة تنظيف بالجبيل

    شركة تنظيف مسابح بالجبيل
    شركة تنظيف خزانات بالجبيل

    ReplyDelete
  12. This comment has been removed by the author.

    ReplyDelete
  13. شركة طيوب لتسليك المجاري تعد الشركة الاولي بالمنطقة الشرقية لتسليك المجاري وشبكات الصرف وبالوعات الصرف للمطابخ والحمامات باستخدام افضل الاجهزة الحديثة وامهر العمالة المتخصصة والمدربة علي تسليك مجاري المياه وسبكات الصرف وفق القواعد الاساسية لتسليك المجاري فتعد شركة طيوب لتسليك المجاري خير صديق لراغبي تسليك مجاري المياه فلديها افضل شركة تسليك مجاري بافضل جود وارخص الاسعار بجميع مدن ومحافظات المنطقة الشرقية بالمملكة العربية السعودية فلدينا الخدمات الاتية

    شركة طيوب لتسليك المجاري
    شركة طيوب لتسليك المجاري بالقطيف
    شركة طيوب لتسليك المجاري بالدمام
    شركة طيوب لتسليك المجاري بالخبر
    شركة طيوب لتسليك المجاري بالجبيل
    شركة طيوب لتسليك المجاري بالاحساء
    طيوب للمجاري
    طيوب لتسليك المجاري بالقطيف
    طيوب لتسليك المجاري بالمنطقة الشرقية

    ReplyDelete
  14. خدمات تسليك المجارى المسدودة ضمن المنازل، بأفضل الاجهزة الحديثه لحل المشكله فى اسرع
    شركة تسليك مجارى بالاحساء
    من اصعب المشاكل التى تواجه عملاؤنا الكرام فى مدينة الاحساء هى مشاكل انسداد انابيب المجارى

    شركة تسليك مجارى ببقيق
    شركة مكافحة حشرات ببقيق

    شركة مكافحة الحمام بالدمام

    ReplyDelete

Auto Post Signature

Auto Post  Signature