المبيضات ، التقويم ، وحساسية الاسنان :(

Saturday, October 03, 2015


مرحبا

البوست السابق تكلمت فيه عن روتين عنايتي خلال هالفترة
من ضمنه كنت حابه اتكلم عن عناية الاسنان .. بس حسيت عندي معلومات ونصايح حابه اوصلها لكم من خلال تجاربي
فكتبت بوست خااااص بالاسنان فقط واتمنى تستفيدون

،

خلوني ابدأ من العلاجات الاقدم اللي عملتها للاجدد ..



من سنتين تقريباً عملت تقويم شفاف لأسناني نزلته قبل زواجي ب ٥ ايام .. 

 ليش عملتة ؟ 

اسناني كانت مصفوفه وجميله وماكان عندي اعتراض إلا على بروز طفيف بالاسنان العلويه ..
وكان شئ بسيييييط لايذكر ف كنت مستبعده اني ادخل نفسي في مشاكل التقويم 
لحد ماطلعت لي اضراس العقل وبدأت اسناني تتغير ترتيبها :(
فكي صغير واضراس العقل ماكان لها مكان فلما طلعت سببت تزاحم وضغط على بقيه الاسنان ..
فخربط لي صف الاسنان السفليه وصار عندي اثنين من الاسنان الامامية متراكبة 
رحت لدكتور اسنان و عمل لي خطه علاجيه تقويميه للاسنان اللي تحت فقط تنتهي بحدود ٣ - ٤ شهور 
بينما لو حابه ازبط بروز الاسنان العلويه مره وحدة بما اني كدا كدا مركبه تقويم راح يستغرق الموضوع مني ٩ شهور ككل
ف اخترت اعالج المشكلتين بنفس الوقت واغتنم هالفرصه 
وحرفياً ندمت :( 
العلاج استمر الى سنتين ..
وللحظه فك التقويم والدكتور يحاول يمدد المده اكثر بس فهمته اني راح اتزوج وماابيه نهائياً :(
سنتين والعلاج مااكتمل تماماً !! وهذي الفتره الطبيعيه للتقويم ومهما قالو اقل من كدا كلو كلام فاضي ..
و وعود كاذبه التقويم ياخذ من سنه ونص الى سنتين ونص من عمرك 
وهي مده جدا طويله جدا جدا

لحد يفهم من كلامي اني انقد تقويم الاسنان ككل .. لكن التقويم وعموماً عيادات الاسنان صايرة عندنا تجارة
والدليل بكل زاوية شارع بجدة فيه مركز تقويم اسنان .. وغير كدا التقويم مشاكله ع الاسنان متعبه جداً
اذا كان مجرد دلع و مافيه مشكله حقيقيه و واضحة ماانصح فيه بتاتاً

 عيوبة من وجهة نظري 

الشكل كان سئ بالقليله من وجهه نظري لاني مااحبه ولا بحياتي حطيت لون بالتقويم ودايم شفاف 
ممكن للاصغر سناً يكون جذاب بس لي ماكان يعجبني نهائياً واشوف شكله سيء خصوصاً مع الارواج الحمراء و الغامقة

التنظيف جداً صعب مهما اهتميتي و جبتي كل اداوات التنظيف يظل صعب 
وهالشئ راح يكون له اثر سلبي على الاسنان ولونها وصحة اللثه بعد ماتنزلي التقويم
وكمان التسوس راح تكونين معرضة له مهما نظفتي
و من سلبيات التقويم الشفاف يصفر بسرعه ويصفر بااسنانك معاه :(

مضر حتى على صحه اللسان .. كنت حاطه قطعه معدنيه يسمونها الدكاتره جسر
وظيفتها تربط بين الضروس العلويه من اليمين واليسار ببعض من الداخل للتثبيت
مالقيت له صوره واضحه بس عموما كان جسر حديدي ممتد من اليمين لليسار داخل الفم فوق اللسان
فكان يضغط على اللسان خصوصاً خلال النوم او عند اقفال الفم
تصحي ثاني يوم تلاقي اثر الحديده او الجسر على لسانك :(
يوم ورا يوم مع الضغط يصير اللسان فيه جرح واثر مكان الضغط :(

المصيبة الكبرى في تنزيل التقويم تعرفون زرادية الخلع يجيبها ويكسر حبات التقويم اللي ع الاسنان
وبعدها يكشط الغراء او اي بقايا ع السن بجهاز يبرد السن
بعد هالكشط صارت اسناني في منتهى الحساسية اظن انة بالغلط كشط طبقة من ميناء الاسنان 
عن نفسي جداً كارهته مهما كانت النتيجة جميله بالنهايه احس اني عذبت نفسي وضريتها اكثر مما نفعتها

،


بعد مانزلت التقويم كنت جداً مبسوطة بالنتيجة وابي بسرعة ابيض اسناني كان باقي على زواجي اسبوع بس ..
اخذت هذي اللزقات واستخدمتها مرتين خلال هالاسبوع .. ماحسيت بفرق كبير ..
كنت لما احطها احس بالم غريب مااعرف كيف اوصفه كانو قشعرة بالاسنان
بس مااقدر احكم عليها لاني زي ماقلت مااستخدمتها الا مرتين فقط قبل زواجي
 ولما بدأت مشاكل اسناني بالظهور .. اضطريت اتركها تماماً



طوال فتره التقويم كنت استخدم معاجين و غسولات لطيفه للاسنان الحساسه .. 
بس بنهايه فتره التقويم  و قبل زواجي بشهر ونص تقريباً بديت اغير واستخدم معاجين التبيض 
ومنهم كريست ثري دي اخذته من صيدليه وايتس ب ٦٠ ريال 
كنت اعتقد انه ماحيكون له تاثير كبير لاني مانزلت التقويم لسه بس حبيت ابدأ فيه بفتره كافيه 
عشان لو يسبب لي حساسيه او شيء اقدر اوقفه ..

للاسف البايع اللي اخذتة منة ماكان عنده خبرة ولانبهني انة يستخدم بمعدل مرتين / ثلاثة بالاسبوع فقط
وانا كنت استخدمة باليوم مرتين ثلاثة .. واتوقع كثير بنات يستخدمونة كمعجون يومي
لانه مكتوب علية كدا .. هالشئ غلط غلط غلط وماكتشفت الا لما طاح الفاس بالراس ..
بعد ماكنت بالاسبوع الثالث من زواجي حرفياً مااقدر اتكلم ..
لو فتحت فمي بس الهواء يسبب لي الم شديد بالاسنان ..

رحت الدكتور ووقف لي كل المبيضات لانها سبب رئيسي في حساسية الاسنان ..
ونبهني ان هالمعجون يستخدم مرتين الى ثلاث مرات اسبوعيا وعلى فترات متباعدة
اللي يستخدمونة يومياً انتبببببببهو ترا الم الحساسية شئ فضيع الله لايكتبه لكم
صرت عايشة على المسكنات ومعاجين للاسنان الحساسة لحد ماراح الالم الشديد
مااختفت حساسية اسناني للان بس خفت كثير 


استخدمت معاجين سينسوداين ولافادت معاي ضعيفة جدا وكثير ماركات للاسنان الحساسة ماجابت نتيجة ..
ماارتحت الا على هذا المعجون من كولقيت رررررائع بمعنى الكلمه
يستخدم يومياً بشكل طبيعي ، و مرتين بالاسبوع تحطين كميه منه على اصباعك وتدلكين الاسنان
تخلينة كم دقيقة وتغسلينه
وظيفتة يرجع يبني لك ميناء الاسنان وهالشيء يخفف كثير حساسية الاسنان
تلاقوة بكل مكان بالصيدليات و السوبر ب ٣٥ اظن

الغسول شئ لابد منة بس مو بإفراط لاانة برضو بيسبب نتايج عكسية ويحسس الاسنان لو بالغتي
يوم اي ويوم لا اذا كان خفيف .. استخدمت كثير بس حبيت هذا من سينسوداين لانة خفيف كثير كثير اقرب يكون مويا
و غسول الوادانت ممتاز بس استخدمة بين فترات متباعدة لاني حالياً مااقدر استحمل حرارتة وانتعاشة للاسف
والا كان من مفضلاتي زمان :(

بس هذي كانت معاناتي مع حساسية الاسنان فحبيت انبهكم عن المبيضات و التقويم لاتعملوة لغير حاجة فعليه
واللي عندها خبرة او منتجات كويسه عن حساسية الاسنان تخبرني لان مشكلتي ماانحلت تماماً للان :(


دمتم بود 


9 comments on "المبيضات ، التقويم ، وحساسية الاسنان :( "
  1. اختصرت معاني اللي أمر فيها حاليا وانتظر ينفك بأسرع وقت

    ReplyDelete
  2. خليتيني اتردد بموضوع التقويم ... طيب لو عندك تجارب عن عيادات التجميل بجده اذكريها لنا .. افكر اسوي فلير بسيط ومحتاره وين اروح

    ReplyDelete
  3. ، يعطيك الف عافيه عالبوست ، بالنسبة لغسول الفم فانا استخدم باردونتكس جدا كويس انا اسناني حساسه فذا الغسول خفف الم الاسنان ليا كثير و بالنسبة لمعجون الاسنان استخدمي برضو من باردونتكس وبس :)

    ReplyDelete
  4. انا شفت صورة معجون كريست عندك بالانستقرام وماصدقت خبر رحت اشتريته بدون لا اعرف وش نتيجة تجربتك معه المهم استخدمته يومياً وعجبتني النتيجه لان مع التقويم صفرت اسناني بس بعد فتره حسيت بحساسيه بااسناني والم عرفت انه السبب وقطعته على طول

    ReplyDelete
  5. خليتني اغير رايي رغم اني كنت متردده حيل لاني اكره شكله و اكره شعوره بالفم ><

    ReplyDelete
  6. انا الان مركبة تقويم وقبل كنت خايفة لان كثير من زميلاتي بعد مايشدوه يتالمون ومايقدرون ياكلون وحالتهم حالة بس بعد ماركبته اول شهر ما اقدر حتى افتح فمي كويس من الالم بس بعده ابدا ما يوجع بس بعد الشد يوجع بالاسنان الامامية كم يوم وخلاص ولازم لازم قبل تفكري تركبيه تسوي فحص للاسنان انا كان عندي تسوس بسيط وقالت لي الدكتورة ممكن مع التقويم يزيد لان الحلقة راح تكون عليه ويصعب تنظيفه وشلته الحمدلله
    بس حبيت افيدكم بتجربتي

    ReplyDelete
  7. انا الان مركبة تقويم وقبل كنت خايفة لان كثير من زميلاتي بعد مايشدوه يتالمون ومايقدرون ياكلون وحالتهم حالة بس بعد ماركبته اول شهر ما اقدر حتى افتح فمي كويس من الالم بس بعده ابدا ما يوجع بس بعد الشد يوجع بالاسنان الامامية كم يوم وخلاص ولازم لازم قبل تفكري تركبيه تسوي فحص للاسنان انا كان عندي تسوس بسيط وقالت لي الدكتورة ممكن مع التقويم يزيد لان الحلقة راح تكون عليه ويصعب تنظيفه وشلته الحمدلله
    بس حبيت افيدكم بتجربتي

    ReplyDelete
  8. ضروري تعملي التقويم عند دكتور شاطر عندك الدكتور بديع سرحال بعياداة ذا كلنكس ممتاز صاحبتي بالشغل مدحتلي إياه
    لازم نتاكد قبل مانسوي أي شي لانه ممكن يخرب بدل مايصلح
    اذا حابة أي وحدة تسوي عنده هذا رقم عيادتهم 4651919

    ReplyDelete
  9. السلام عليكم
    تكبير الصدر تكبير الارداف ونفخ الوجه وتسمين الساقين سرجمال المغربيات
    https://www.facebook.com/%D8%AA%D9%83%D8%A8%D9%8A%D8%B1-%D8%A7%D9%84%D8%B5%D8%AF%D8%B1-%D8%AA%D9%83%D8%A8%D9%8A%D8%B1-%D8%A7%D9%84%D8%A7%D8%B1%D8%AF%D8%A7%D9%81-%D9%88%D9%86%D9%81%D8%AE-%D8%A7%D9%84%D9%88%D8%AC%D9%87-%D9%88%D8%AA%D8%B3%D9%85%D9%8A%D9%86-%D8%A7%D9%84%D8%B3%D8%A7%D9%82%D9%8A%D9%86-%D8%B3%D8%B1%D8%AC%D9%85%D8%A7%D9%84-%D8%A7%D9%84%D9%85%D8%BA%D8%B1%D8%A8%D9%8A%D8%A7%D8%AA-806478746184842/

    ReplyDelete

Auto Post Signature

Auto Post  Signature